विश्व पारा तेक्वान्दोका पदक विजेता खेलाडी यादव कुँवरलाई विश्व तेक्वान्दो महासंघ(डब्लूटिएफ)ले सम्मान गरेको छ । डब्लुटिएफका अध्यक्ष चुङयोन चोइले हस्ताक्षरित सम्मान पत्र डब्लुटिएफले नेपाल तेक्वान्दो संघलाई पठाएको थियो । सो पत्र राष्ट्रिय खेलकुद परिषद्(राखेप)का सदस्यसचिव केशवकुमार विष्टले कुँवर हस्तान्तरण गरे ।
डब्लुटिएफले नेपालमा पारा तेक्वान्दो विकासका लागि महत्वपूर्ण भूमिका खेलेको र विश्व पाराल्याम्पिक तेक्वान्दोमा सहभागिता जनाई सहयोग गरेकोले उनलाई सम्मान गरिएको थियो । यादव रसियामा सम्पन्न चौथो विश्व पारा तेक्वान्दो च्याम्पियनसिपमा कास्य र स्विटजरल्यान्डमा सम्पन्न पाँचौँ विश्व पारा तेक्वान्दो च्याम्पियनसिपमा रजत पदक विजेता खेलाडी हुन् ।
उनी हाल नेपालमा पारा तेक्वान्दोमा अन्य खेलाडीहरूको सहभागिता गराई पारा तेक्वान्दो खेल विकासमा लागिपरिरहेका छन् । ताइपेइमा केही महिना अगाडि मात्र सम्पन्न पारा तेक्वान्दोमा च्याम्पियनसिप उनी प्रशिक्षक रहँदा नेपालले कास्य पदक जितेको थियो ।