साबिक विजेता लुम्बिनी फाइनलमा प्रवेश

साबिक विजेता लुम्बिनी लायन्स नेपाल प्रिमियर लिग (्एनपिएल)को फाइनलमा प्रवेश गरेको छ । फाइनल प्रवेशको क्रममा लुम्बिनीले मङ्गलवार भएको खेलमा सुदूर पश्चिम रोयल्सयलार्ई ६ विकेटले हराएको हो ।
सुदूर पश्चिमले दिएको १०६ रनको लक्ष्य पछ्याएको लुम्बिनीले १६ ओभर ४ बलमा ४ विकेट गुमाएर १०८ रन बनायो । लुम्बिनीका निरोसान डिकेवालले अविजित रहँदै ५९ रन जोडे । ३७ बलको उनको पारीमा ७ चौका र दुई छक्का समावेश थियो । कप्तान रोहित पौडेलले २१ रन जोडे । सुदूरका थारुन्डु रत्ननायकले २ विकेट लिए ।
यस अघि त्रिभुवन विश्वविद्यालय क्रिकेट मैदानमा भएको खेलमा टस हारेर पहिले ब्याटिङ गरेको सुदूर पश्चिमले ८ विकेटको क्षतिमा १०५ रनको योगफल खडा गरेको हो । सुदूर पश्चिमका लागि दीपेन्द्र सिंह ऐरीले ५२ रन जोडे । उनले ५१ बलको सामना गर्दै ३ चौका र एक छक्का प्रहार गरे ।
चौथो ओभरको पहिलो बलमा ८ रन जोड्दै तेस्रो विकेट गुमाएको सुदूर पश्चिमका लागि दीपेन्द्र र इसान पाण्डेले चौथो विकेटका लागि ६४ रनको साझेदारी गर्दै सङ्कटबाट केही उठाएका थिए ।
२७ रन बनाएका पाण्डे १५ औ ओभरको पहिलो बलमा रन आउट भए पछि पारीको अन्त्यसम्म सुदूर पश्चिम रक्षात्मक बनेको थियो ।
लुम्बिनीका रुबेन ट्रम्पलम्यानले ४ ओभरमा १४ रन खर्चेर २ विकेट लिए । उनले पावर प्लेमा ३ ओभर बलिङ गर्दै ७ रन खर्चेर दुई विकेट लिएका हुन् । विदेशबाट आइ पुगेर पहिलो खेल खेलेका जर्ज मुन्सीलाई पारीको पहिलो बलमा नै ट्रम्पलम्यानले बोल्ड गरे ।
अभिषेक गौतमले ४ ओभरमा ११ रन खर्चेर १ विकेट लिए । किशोर महतोले ४ ओभरमा १९ न खर्चेर १ विकेट लिए । शेर मल्ल ४ ओभरमा २७ रन खर्चेर २ विकेट लिए । पराजित सुदूर पश्चिमले दोस्रो क्वालिफायरमा चितवन राइनोज र काठमाडौँ गुर्खाज बिचको विजेतासँग खेल्ने छ ।