Manoj Shiama
19 November, 2026 5:26 am

नेपाल प्रिमियर लिग (एनपीएल) को तेस्रो संस्करणअन्तर्गत बुधबार भएको एलिमिनेटर खेलमा काठमाडौं गोर्खाजलाई ६१ रनले पराजित गर्दै चितवन राइनोज पहिलो पटक क्वालिफायरमा पुगेको छ ।

काठमाडौं २०५ रनको विशाल लक्ष्य पछ्याउने क्रममा निर्धारित २० ओभरमा ९ विकेटको क्षतिमा १४३ रनमा समेटिएपछि चितवनले क्वालिफायरमा स्थान पक्का गरेको हो ।

काठमाडौंका लागि विलियम वसिस्टोले सर्वाधिक ३७ रन बनाए। त्यस्तै सेहानले २४ र रसिद खानले १२ रनको योगदान दिए । सोनु देवकोटा ६, साम हेजलेट ३, साहिल पटेल २ र कप्तान करण केसी तथा जहानदाद खान एकएक रन बनाएर आउट भए ।

बलिङतर्फ चितवनका रिजन ढकालले ४ विकेट लिए। उनले ४ ओभरमा १६ रनमात्रै खर्चेर ४ विकेट लिएका हुन्। साथै रिजन एनपीएल तेस्रो संस्करणमा सर्वाधिक विकेट लिने खेलाडीको शीर्ष स्थानमा छन् ।

त्यस्तै उसामा मिरले ४ ओभरमा १५ रन दिएर ३ विकेट लिँदा सहाहुद्दिन खान र कुशल मल्लले समान एकएक विकेट झारे ।

कीर्तिपुरस्थित त्रिवि अन्तर्राष्ट्रिय क्रिकेट टस जितेर ब्याटिङ गरेको चितवनले निर्धारित २० ओभरमा ४ विकेटको क्षतिमा २०४ रनको योगफल तयार गरेको हो ।

चितवनको लागि ओपनर मिसाराले सर्वाधिक १२० रनको योगदान दिए। उनले ५३ बलमा ४ चौका र ८ छक्का सहयोगमा शतक पूरा गरे।

त्यस्तै कप्तान रविले ४२ बलमा ३ चौका र २ छक्का सहयोगमा ५३ रन बनाए। अर्का ओपनर देव खनाल १७ रन बनाएर आउट हुँदा डेविड मलान विनारन पेभेलियन फर्किएका थिए ।

बलिङतर्फ काठमाडौंका लागि करण केसी र रासिद खानले समान २–२ विकेट लिए ।

चितवनले बिहिबार सुदूरपश्चिम रोयल्ससँग दोस्रो क्वालिफायर खेल्नेछ । मङ्गलवार भएको पहिलो क्वालिफायरमा सुदूरपश्चिमलाई ६ विकेटले हराउँदै लुम्बिनी फाइनलमा पुगेको थियो ।