नेपाल प्रिमियर लिग (एनपीएल) को तेस्रो संस्करणअन्तर्गत शनिवार भएको खेलमा लुम्बिनी लायन्ससँग ४ विकेटले पराजित भएसँगै विराटनगर किंगस् प्रतियोगिताको प्लेअफबाट बाहिरिएको छ ।

यसअघि नै क्वालिफाइ भइसकेको लुम्बिनी भने आजको जीतसँगै अङ्क तालिकाको शीर्ष स्थानमा उक्लिएको छ । विराटनगरको हारपछि काठमाडौं गोर्खाज र चितवन राइनोज प्लेअफमा पुगेका छन् ।

लुम्बिनी शीर्ष स्थानमा रहेर पहिलो क्वालिफायरमा पुगेको छ। क्वालिफायर पुग्ने अर्को टोलीको टुङ्गो भोलि हुने लिग चरणको अन्तिम खेलबाट लाग्नेछ।

शनिवार विराटनगरले दिएको १७६ रनको लक्ष्य लुम्बिनीले १ बल अगावै ६ विकेटको क्षतिमा पूरा गरेको थियो । उसको लागि ओपनर डार्सी सर्ट ५४ र आशिफ शेखले ४५ रन बनाए । त्यस्तै कप्तान रोहित पौडेल ९ रन बनाएर रन आउट भए ।
अलि शेखले २७ र सन्दीप जोराले २५ र रुवेन ट्रम्पलमेनले अविजित ६ रनको योगदान दिए ।

बलिङतर्फ विराटनगरका अपराजित पौडेलले २, चरिथ असलंका र रुपेश सिंहले समान एक एक विकेट लिए ।

यसअघि कीर्तिपुरस्थित त्रिवि अन्तर्राष्ट्रिय क्रिकेट मैदानमा लुम्बिनीले टस जितेर फिल्डिङ रोजेपछि ब्याटिङ गरेको विराटनगरले निर्धारित २० ओभरमा ४ विकेटको क्षतिमा १६६ रनको योगफल बनाएको थियो ।

विराटनगरको लागि इमरान शेख २४ रन बनाउँदा रिटायर्ड हर्ट भए । ११ औँ ओभरको दोस्रो बलमा खुट्टामा चोट बोकेपछि इमरान पेभेलियन फर्किएका थिए । त्यसपछि क्रिज सम्हाल्न शुभम रन्जाने पुगेका थिए।

विराटनगरका लागि चरिथ असलंकाले सर्वाधिक ६४ रनको योगदान दिए ।

शुभम रन्जनेले ३१ र बसिर अहमद ४ रनमा अविजित रहे । लोकेश बमले १५ रनको योगदान दिए ।

लुम्बिनीका लागि किशोर महतोले २ विकेट लिए । रुवेन ट्रम्पलमेन र अविशेष गौतमले समान एक एक विकेट झारे ।