एनपिएल : जर्ज मन्सीको विस्फोटक ब्याटिङ र शतकमा सुदूर पश्चिमले जित्यो उपाधि

चौका र छक्काको वर्षा, अन्तिम समयसम्म कायम जितको रोमाञ्चक प्रतिस्पर्धा र दर्शकदीर्घाको उत्साहपूर्ण साथबीच नेपाल प्रिमियर लिग )एनपिएल) क्रिकेटको को तेस्रो संस्करणको को उपाधि सुदूरपश्चिम रोयल्सले जितेको छ।
कीर्तिपुरस्थित त्रिभुवन विश्वविद्यालय अन्तरराष्ट्रिय क्रिकेट मैदानमा आज भएको फाइनल प्रतिस्पर्धामा लुम्बिनी लायन्सलाई १० विकेटले पराजित गर्दै च्याम्पियन बनेको सुदूरपश्चिमले एनपिएलमा पहिलोपटक उपाधि उचालेको हो।
लगातार पहिलो र दोस्रो संस्करणको एनपिएलमा फाइनलमा पुग्दै उपविजेतामा सिमित रहेको सुदूरपश्चिमले यसपटक इतिहास कायम गर्यो। दोस्रो संस्करणको एनपिएलमा लुम्बिनीले सुदूरपश्चिमलाई पराजित गर्दै उपाधि जितेको थियो।
गत कात्तिक ९ गते सुरु भएको तेस्रो संस्करणको एनपिएलमा सुदूरपश्चिम विजेता बनेको छ। यसअघि भएको पहिलो संस्करणमा जनकपुर बोल्टल्स र दोस्रो संस्करणमा लुम्बिनी लायन्सले उपाधि जितेका थिए।
लिगचरणमा सुदूरपश्चिमको यात्रा निकै सङ्घर्षपूर्ण रह्यो। पहिलो खेलमा लुम्बिनीसँग पराजित भएपछि सुदूरपश्चिमले पोखरालाई हराउँदै खेलमा पुनरागमन गरेको थियो। तेस्रो खेलमा विराटनगरसँग पराजित भए पनि चितवन, कर्णाली, जनकपुर र काठमाडौँलाई लगातार हराउँदै लिग चरणमा दोस्रो स्थान हासिल गर्यो। सुदूरपश्चिमले लिग चरणमा १० अङ्क बटुलेको थियो।
पहिलो क्वालिफायरमा लुम्बिनीसँग पराजित भएपछि सुदूरपश्चिमले दोस्रो क्वालिफायर खेल्नुपरेको थियो। चितवनलाई हराउँदै सुदूरपश्चिम फाइनल यात्रा तय गर्न सफल भयो।
यसरी सुदूरपश्चिम लगातार दुई खेल जित्दै लगातार तेस्रोपटक उपाधि भिडन्तसम्मको यात्रा तय गर्न सफल भएको थियो। त्यसो त लुम्बिनीले प्रतियोगिताको सुरुआतदेखि नै राम्रो खेल प्रदर्शन गरेको थियो। पहिलो खेलमा सुदूरपश्चिमलाई हराएको थियो। दोस्रो खेल चितवन राइनोजसँग थियो तर वर्षाका कारण रद्द भएको थियो।
पोखरा र जनकपुरलाई हराएको लुम्बिनी पाँचौँ खेलमा काठमाडौँसँग पराजित भएको थियो। त्यसपछि कर्णाली र विराटनगरलाई हराउँदै लिग चरणको शीर्ष स्थानमा रह्यो। लिग चरणमा लुम्बिनीले ११ अङ्क बटुलेको थियो । पहिलो क्वालिफायरमा पनि लुम्बिनीले सुदूरपश्चिमलाई पराजित गरेको थियो। यससँगै टोलीले सिधैँ फाइनलमा स्थान बनाएको थियो।
फाइनलमा सुदूरपश्चिम रोयल्सको शानदार जित
आजको फाइनल खेलमा जर्ज मन्सीको आक्रामक शतकको मद्दतमा सुदूरपश्चिम रोयल्सले लुम्बिनी लायन्समाथि १० विकेटको शानदार जित निकालेको हो। लुम्बिनीले दिएको १५६ रनको लक्ष्य पछ्याएको सुदुरपश्चिमले १३ दशमलव ३ ओभरमा कुनै विकेट नगुमाई लक्ष्य पूरा गर्यो।
सुदूरपश्चिमको जितका नायक बनेका मन्सीले अविजित १२५ रनको विस्फोटक इनिङ्स खेले। उनले ५४ बलमा ८ चौका र १२ छक्का प्रहार गर्दै १२५ रनको योगदान गरे। उनको ब्याटिङले लुम्बिनीका बलरलाई सुरुदेखि नै दबाबमा राखेको थियो।
मन्सीलाई साथ दिएका विनोद भण्डारीले पनि अविजित ३० रन बनाए। उनले २७ बलमा ३ चौका प्रहार गर्दै ३० रन जोडे। दुवै ब्याटरबीच पहिलो विकेटका लागि १५८ रनको अविजित साझेदारी भएको थियो।
मन्सीले २८ बलमा अर्धशतक पूरा गरेका थिए भने ४९ बलमै शतक प्रहार गर्दै आफ्नो आक्रामक लय देखाए। सुदूरपश्चिमले पावरप्लेमा मात्रै ६० रन जोडेको थियो। त्यसपछि पनि लुम्बिनीका बलरले विकेट लिन सकेनन्।
त्यसअघि टस हारेर पहिला ब्याटिङको निम्तो पाएको लुम्बिनीले निर्धारित २० ओभरमा ६ विकेट गुमाएर १५५ रनको योगफल बनाएको थियो। लुम्बिनीका लागि दिलीप नाथले अविजित ३९ रन बनाए। उनले ३१ बलमा ३ छक्का प्रहार गरे।
कप्तान रोहितकुमार पौडेलले ३१ बलमा ३० रन जोड्दा निरोशन डिक्वेलाले १७ बलमा २८ रन बनाए। अलि शेखले १२ बलमा २४ रन जोड्दा डी’आर्सी शर्टले १८ बलमा २१ रनको योगदान गरे।
सुदूरपश्चिमका स्कट कुगेलेइनले २५ रन खर्चेर २ विकेट लिए। हेमन्त धामी, थारिन्दु रत्नायके र दीपेन्द्रसिंह ऐरीले समान १/१ विकेट हात पारे।
आठ टोली सहभागी यस प्रतियोगितामा काठमाडौँ गोर्खाज सात खेलमा चार जित र तीन हारसहित आठ अङ्क जोडेर तेस्रो स्थानमा रह्यो। चितवन राइनोज तीन जित, तीन हार र एक खेलमा बराबरीसहित चौथो स्थानमा रह्यो। चितवनले सात अङ्क जोडेको थियो।
विराटनगर किङ्स पाँचौँ र कर्णाली याक्स छैटौँ स्थानमा रहे। दुवै टोलीले समान सात खेलबाट तीन जित र चार हारसहित समान ६ अङ्क जोडका थिए।
नेट रनरेटका आधारमा विराटनगरले कर्णालीलाई पछि पारेको हो। पोखरा एभेन्जर्स दुई जित र पाँच हारसहित चार अङ्क जोडेर सातौँ स्थानमा रह्यो। पहिलो संस्करणको विजेता जनकपुर बोल्ट्स पनि दुई जित र पाँच हारसहित समान चार अङ्क जोड्दै अन्तिम स्थानमा सीमित भयो। नेट रनरेटमा भने पोखरा जनकपुरभन्दा अगाडि रह्यो।