नेपाली राष्ट्रिय महिला फुटबल टोली एएफसी महिला एसियन कप २०२६ छनोटको समूह चरणबाटै बाहिरिएको छ। निर्णायक खेलमा उज्बेकिस्तानसँग टाई ब्रेकरमा ४–२ को हार बेहोर्दै नेपाल समूह चरणबाटै बाहिरिएको हो । लिग चरणमा अङ्क र गोल पनि बराबर भए पछि पहिलो स्थानको टुङ्गो टाईब्रेकरबाट लागेको हो । 

समूह ‘एफ’ अन्तर्गतको अन्तिम खेलमा निर्धारित ९० मिनेटको खेल ३–३ को रोमाञ्चक बराबरीमा सकिएपछि खेलको निर्णय टाइब्रेकरमार्फत गरिएको थियो ।

नेपालका लागि टाई ब्रेकरमा गीता राना र सबिता राना मगरले गोल गरे । कप्तान सावित्रा भण्डारी साम्बा र गोलकिपर अञ्जना राना मगरको प्रहार असफल भएपछि नेपाल पराजित भयो ।

खेलको सुरुवातमै उज्बेकिस्तानले आक्रामक प्रदर्शन गर्दै दोस्रो मिनेटमै पहिलो गोल गरेको खेलको ११औँ मिनेटमा उज्बेकिस्तानले आत्मघाती गोलको मद्दतले अग्रता दोब्बर बनाएको थियो । उज्बेक कप्तानको प्रहार डिफेन्डर समीक्षा घिमिरेको खुट्टामा लाग्दै गोलमा परिणत भएको थियो ।

नेपालका लागि २४औँ मिनेटमा सावित्रा भण्डारी साम्बाले गोल गरिन् ।  डिबक्स बाहिरबाट उनले गरेको शक्तिशाली प्रहार गोलमा परिणत भएको हो । 

३८औँ मिनेटमा उज्बेकिस्तानले पेनाल्टी पाएको थियो ।  जब नेपाली डिफेन्डर सरस्वती हमालले ह्याण्ड भए पछि शोएमोभले पेनाल्टीको उपयोग गरिन् । 

दोस्रो हाफमा १० खेलाडीमा सीमित उज्बेकिस्तानविरुद्ध नेपाल खेलमा फर्किएको हो । उज्बेक खेलाडी इग्रासेभाले हाफको अन्त्यतिर सावित्रामाथि खराब ट्याकल गरेपछि रातो कार्ड पाउँदै मैदानबाट बाहिरिइन् ।

७१औँ मिनेटमा कप्तान साम्बाले व्यक्तिगत दोस्रो गोल गरिन् भने त्यसको दुई मिनेटपछि नै उनले ह्याट्रिक पुरा गरिन् ।