आयोजक आइडियल इङलिस उमाविको ‘ए’ टिम र साइपाल एकेडेमीको ‘बी’ टिम प्रथम आइडियल कप अन्तरकलेज सिक्स ए साइड छात्र फुटबल प्रतियोगितामा शुक्रबार क्वाटरफाइनलमा प्रवेश गरेका छन् ।चावहिलको गणेशथान चौरमा भएको उद्घाटन खेलमा आइडियलले केयू सिटी कलेजलाई ५–१ गोलले पराजित ग¥यो । आइडियलका सन्जिव श्रेष्ठले ह्याट्रिक गरे भने थप २ गोल निशान्त पोखरेलको नाममा रह्यो । केयूका राजु भण्डारीले १ गोल सान्त्वना गोल गरे । साइपालले एसबाट वाकओभर पायो ।
अन्य खेलमा जित हात पार्दै पेन्टागन र नासा इन्टरनेसनल कलेज पनि क्वाटरफाइनलमा पुग्न सफल भए ।पेन्टागनले जय मल्टिपल क्याम्पस (जेएमसी) लाई ४–२ गोलले हरायो । पेन्टागनका राजन तामाङले २ र अल्ब्राइट कार्कीले १ गोल गरे । थप एक गोल आत्माघाती थियो । नासाले टाइम्स इन्टरनेसनल कलेजलाई ३–२ गोलले पाखा लगायो । नासाका निशान्त मगर, विवेक कँडेल र देवराज ओलीले १–१ गोल गरे । टाइम्सका सञ्जय गड्तौला र सन्जिप घिसिङले १–१ गोल गरे ।
प्रतियोगिताको आइडियलका कोओर्डिनेटर श्यामबाबु पोखरेलले रेफ्रीलाई बल हस्तान्तरण गरी उद्घाटन गरेका थिए । पुस १४ गतेसम्म चल्ने नकआउट प्रतियोगितामा १६ टिम सहभागी छन् । विजेताले १० हजार र उपविजेताले ५ हजार नगद पुरस्कार हात पार्ने छन् ।