काठमाडौं – एएफसी एसिया कप २०२७ को छनोट अन्तर्गतको तेस्रो चरणमा नेपाल भियतनामसँग ३–१ गोल अन्तरले पराजित भएको छ । पहिलो हाफसम्म सन्तुलित प्रदर्शन गर्दै खेललाई बराबरीमा राख्न सफल भएको नेपाल दोस्रो हाफमा भने दबाब झेल्न बाध्य बन्यो ।

खेलको नवौँ मिनेटमै ताइन लिन्हले गरेको गोलमार्फत भियतनामले अग्रता लिएको थियो ।  नेपालका सनिश श्रेष्ठले १७ औँ मिनेटमा बराबरी गोल गर्दै टोलीलाई खेलमा फर्काए । 

पहिलो हाफको अतिरिक्त समयमा नेपालका लकेन लिम्बुले रातो कार्ड पाएपछि टोली १० खेलाडीमा सीमित भएको थियो । सोही कारण दोस्रो हाफमा नेपाली टोलीमा समन्वय कमजोर भयो र भियतनामले खेलमा पूर्ण नियन्त्रण जमायो ।

६७ औँ र ७२ औँ मिनेटमा लगातार दुई गोल गर्दै भियतनामले सहज जित सुनिश्चित गरेको हो  । 

यस हारसँगै नेपालका लागि आगामी खेलहरूमा पुनरागमन गर्ने दबाब थपिएको छ, जबकि भियतनामले यस जितसँगै समूह चरणमा बलियो स्थिति कायम गरेको छ ।