वीरगन्ज युनाइटेड र खुमलटार यूथ क्लबले सहिद स्मारक बी डिभिजन लिगमा बुधवार आ–आफ्ना प्रतिद्वन्द्वीलाई हराउँदै तालिकामा तीन अङ्क जोडेका छन् । एन्फा मैदानमा सम्पन्न खेलमा वीरगन्ज युनाइटेड सामाजिक यूथ क्लब र खुमलटारले बाँसबारी क्लबमाथि समान १–० जित निकाल्दै तालिकामा तीन अङ्क जोड्न सफल भए ।

वीरगन्ज युनाइटेडलाई सामाजिक यूथ क्लबविरुद्ध जित दिलाउन कृपा कान्त महतो थारूले ७१औँ मिनेटमा गरेको गोल निर्णायक बनेको थियो । प्रतिस्पर्धात्मक बनेको खेलमा दुवै टोलीले पहिलो हाफमा केही राम्रा अवसर सिर्जना गरे पनि सदुपयोग गर्न चुकेका थिए । जितसँगै वीरगन्जले ३ खेलबाट ४ अङ्क जोडेको वीरगन्ज चौथो स्थानमा उक्लिएको छ । यता ३ खेलमा केवल १ अङ्क जोडेको सामाजिक यूथ १४ टिम सम्मिलित लिग तालिकाको पुछारमा पुगेको छ ।

बी डिभिजन लिग अन्तर्गत बुधवारै सम्पन्न दिनको पहिलो खेलमा बाँसबारीविरुद्ध जित निकाल्न खुमलटारले ३०औँ मिनेटमा गरेको गोल निर्णायक भएको थियो । कप्तान सविन केसीले गोल गर्दै टोलीलाई पहिलो हाफमा दिलाएको अग्रता नै स्पष्ट तीन अङ्क जोड्नका लागि पर्याप्त भएको थियो । खुमलटारको जारी लिगमा यो दोस्रो जित हो ।

बी डिभिजन लिग अन्तर्गत दिनको तेस्रो खेलमा चर्च ब्वाईजले मध्यपुर यूथ एसोसिएसनलाई २–० गोल अन्तरले पराजित भयो ।