नयाँ शक्ति नेपाल (घनश्याम) उपत्यका संयोजन समितिले भारतमा भएको १२ औं दक्षिण एसियाली खेलकुद (साग) अन्तर्गत उसुमा स्वर्ण पदक जित्न सफल निमा घर्ती मगरलाई बिहीबार नगदसहित सम्मान गरेको छ । सागमा निमाले नेपाललाई पहिलो स्वर्ण दिलाएकी थिइन् ।
नयाँ शक्तिका सह–अध्यक्ष कमलराज श्रेष्ठले निमालाई नगद २५ हजार र सम्मान पत्र प्रदान गरी सम्मान गरे ।
त्यस्तै उसुकै अन्य पदक विजेता खेलाडीलाई पनि सम्मान गरिएको थियो । सागको उसुमा नेपालले १ स्वर्ण, १० रजत र १ कांस्य जितेको थियो ।
सविता राई, विजय सिन्जाली, विश्व बुढा मगर, सुस्मिता तामाङ, युवराज थापा मगर, हरिप्रसाद गोले, झरना गुरुङ, विन्दु पुन, जुनि राई र राजेश चौधरीले रजत जितेका थिए । सरोज पुनले कांस्य हात पारेका थिए । उनीहरु सम्मान पत्रबाट सम्मानित भए ।
त्यस्तै नेपाल आर्मीका उसु प्रशिक्षक राजीव महर्जनलाई पनि कदर पत्रबाट सम्मान गरियो । सागमा आर्मीका खेलाडीले १ स्वर्ण र ५ रजत जितेका थिए । उसु खेलको विकास र विस्तारमा सहयोग पु¥याएवापत उसु प्रशिक्षक गोपाल श्रेष्ठ र शंकर थापा लेकालीलाई पनि सम्मान गरिएको थियो ।