भारतीय ओलम्पिक संघले भारतको बास्केबल संघमाथि हस्तक्षेप गरेको भन्दै इन्टरनेसनल बास्केटबल फेडेरेसन (फिबा) ले १२ औं दक्षिण एसियाली खेलकुदमा सहभागी सबै राष्ट्रलाई बास्केटबलको प्रतिस्पर्धामा सहभागी नगराउने निर्देशन दिएको छ । योसँगै १२ औं सागमा २२ खेलमा मात्र प्रतिस्पर्धा हुने भएको छ । नेपालको बास्केटबल टोली भने पुर्व निर्धारित कार्यक्रम अनुसार थाइल्यान्डको बैंककबाट सोमबार गुवाहाटी आइपुगेको छ ।
फिबाले मान्यता नदिएको पुनम महाजनले नेतृत्व गरेको भारतीय बास्केटबल संघलाइ भारतीय ओलम्पिक संघले मान्यता दिएपछि फिबाले सो निर्देशन दिएको छ ।१२ औं सागमा पनि पुनमको नेतृत्व गरेको संघले खेलाडी ल्याउने तयारी गरेपछि फिबाले सो निर्देशन दिएको हो । भारतीय बास्केटबल टिम दिल्लीमा रहेको छ । खेल नहुने भएकाले गुवाहाटी नआएको बताइएको छ ।
फिबाले अफगानिस्तान, बंगलादेश, नेपाल, श्रीलंका र माल्दिभ्सको बास्केटबल संघलाई पत्राकार गरि गुवाहाटी र सिलोङमा जारी रहेको १२ औं सागमा आफ्नो बास्केटबल टोलीलाई नलैजान निर्देशन दिएको हो । फिफाका महासचिव पेट्रिक बाउम्यानले जारी गरेको पत्रमा ‘भारतीय ओलम्पिक संघको हस्तक्षेप स्विकार्न सकिदैन । त्यसैले सागमा हुने बास्केबललाई मान्यता दिइने छैन ।’ ११ देखि १६ फ्रेबेओरीसम्म बास्केबल गुवाहाटीमा हुने तालिका रहेको छ ।नेपालको बास्केटबल टोली सोमबार आफ्नो कार्यक्रम अनुसार बैंककबाट गुवाहाटी आइपुगेको छ । नेपाली बास्केटबल टोलीे थाइल्यान्डको राजधानी बैंककमा सागका लागि विशेष प्रशिक्षण लिइरहेको थियो । नेपालको मात्र होइन माल्दिभ्सबाहेक अन्य देशका टोली पनि गुवाहाटी आइसकेको छन् ।
नेपाल ओलम्पिक कमिटीका महासचिव तथा नेपाल बास्केटबल संघका अध्यक्ष लामा टेन्डी शेर्पाले भने,‘हामीले निकै राम्रो तयारी गरेका थियौं । नेपालले राम्रो पदर्शन गर्न सम्भावना थियो । तर फिबाको गाइडलाइन्सविरुद्ध नेपाल बास्केटबल संघ जान सक्दैन ।’
तथापी दक्षिण एसियाली ओलम्पिक संघको बैठकमा नेपालले ओलम्पिक चार्टड अनुसार आफ्नो निर्णय सुधार्न भारतीय ओलम्पिक संघलाई अनुरोध गरेको शेर्पाले बताए । ‘हामीले भारतीय ओलम्पिक संघलाई आफ्नो निर्णय सुधार्न अनुरोध गरेका छौं । तर उसले स्विकारेको छैन ।’
नेपाली टिमका लागि यस अघि नै गुवाहाटी आउने टिकट काटिसकिएकोले नेपालको टिम गुवाहाटी आइसकेको छ । ‘भारतले आफ्नो निर्णय सच्चाएको खन्डमा खेल हुन सक्छ । किनकि सबै टिम गुवाहाटीमै छ ।’ उनले भने ।