दीपक अमात्य कुनै समयमा नेपालका स्टार फुटबलर । सन् १९९६ को दक्षिण एसियाली खेलकुदका स्वर्ण पदक विजेता दीपककै नेतृत्वमा काठमाडौँमा भएको दक्षिण एसियाली खेलकुदमा नेपाली टोली उपविजेता बनेको थियो । कुनै समय नेपाली राष्ट्रिय टोलीका भरपर्दा होल्डीङ मिडफील्डर  दीपकका भाइ सचिन पूर्व फी फा रेफ्रि । थ्री स्टार र जाउलाखेलको अनुभव बटुलेका उनै सचिनकै नेतृत्वमा ब्रिगेड ब्वाइज क्लब ए डिभिजनमा बढुवा भएको हो ।

सचिनकै परिवार भित्रका सदस्य फुटबलकी पूर्व राष्ट्रिय खेलाडी सरिला श्रेष्ठ र बास्केटबलकी हालकी राष्ट्रिय टोलीकी कप्तान सदिना श्रेष्ठ । एक से एक नाम चलेका खेलाडीको बिचको त्यो परिवारमा बुहारीको रूपमा दिपा क्षेत्रीको प्रवेशले त नेपाली खेलकुदमा सो परिवारको साखलाई अझ माथि उठाएको छ । सन् २००९ मा भएको एलाइट राष्ट्रिय रेफ्रि कोर्षको दौरान प्रेममा बाँधिएका सचिन दिपाले दुई वर्ष पछि आफ्नो प्रेमलाई विवाहको स्वरूप दिएका थिए ।

दिपा तीनै खेलाडी हुन् जसले  नेपाली खेलकुदमा बक्सिङ र फुटबल दुवै खेलमा राष्ट्रिय खेलाडीको ताज मात्र पहिरिनन् अन्तर्राष्ट्रिय पदक पनि जितिन् ।

धेरैका लागि रहस्यको विषय हो की दिपा बक्सिङको अन्तर्राष्ट्रिय पदक विजेता हुनु भन्दा अगाडी नै कराँतेको क्षेत्रीय च्याम्पियन थिइन् । साफ खेलको छनोटमा हुने छोरी डङ्गोल समेत पराजित भएकी थिइन् ।

एपीएफमा आबद्ध भए पछि उनी बक्सिङमा आबद्ध भएकी थिइन् । बक्सिङमा आबद्ध भएको केही समयमा नै उनी राष्ट्रिय खेलाडी मात्र भइनन् की नेपाली बक्सिङमा लगभग आठ वर्ष अपराजेय छवि बनाउन सफल भइन् । यसै क्रममा काठमाडौँमा भएको पाँचौँ राष्ट्रिय खेलकुदकी उत्कृष्ट बक्सर उनी सन् २००४ मा भारतको गुहावटीमा भएको एसियाली महिला बक्सिङ च्याम्पियनसिपमा उनी कास्य पदक जित्न सफल भइन् । ६३ किलो तौल समूहमा त्यो साख कायम गरेकी उनले एसियाली पदक भने ७० किलो तौल समूहमा हात पारेकी हुन् ।

नेपाली बक्सिङमा प्रभाव जमाइ रहेकी उनका लागि त्यहाँका वातावरण असहज महसुस हुन थालेको थियो । त्यसो त नेपाली खेलकुदका लेख्य र अलेख्य थुप्रै विकृतिका पाटा छन् ।

यसैले दिपालाई नेपाली बक्सिङ प्रति मोह भङ्ग भएको हो । सामान्य फुटबलको ज्ञान भएकी दिपा यस पछि त्यसै खेलमा सक्रिय भइन् । दिपाको उपस्थिति नेपाली फुटबलमा यसरी जमेको थियो की उनी सहितको जब्बर रक्षापक्ति कै कारण नेपालले दक्षिण एसियाली खेलकुद र दक्षिण एसियाली महिला च्याम्पियनसिप फुटबलका उपाधि माथि धावा बोल्न सफल भएको थियो । भलै, ढाकामा भारतसँग भएको साग खेलकुदमा लामो समय अग्रता १–० को अग्रता लिएको नेपाल त्यो अग्रता जोगाउन नसक्दा उपविजेतामा सीमित भएको थियो ।

सचिन र दिपा दुवै रोजगारीको सिलसिलामा मकाउ पुगे पछि पनि दिपाको खेल प्रतिको मोह यथावत थियो । त्यहाँ पनि उनले रोजगारीबाट समय निकालेर क्लब, फीटेनस सेन्टर र प्रशिक्षण केन्द्रमा आफूलाई व्यस्त राखिन् । त्यहाँ रहँदा पनि धेर क्लब स्तरीय प्रतियोगिता खेलेकी उनी अहिले नेपालमा फर्केकी छिन् ।

अहिले सचिन र दीपक दुवै जना नेपाल फर्केका छन् । रेफ्रिको रूपमा प्राप्त ज्ञानलाई फेरी प्रयोग गर्ने बाटोमा सचिन छन् । यसै गरी, दिपा व्यवस्थापकीय र प्रशासनिक भूमिकाको खोजीमा छन् ।

आशा गरौँ, नेपाली फुटबलले यो जोडीलाई आफ्नो सिप र ज्ञानलाई प्रयोग गर्ने प्रशस्त स्थान दिने छ ।