नेपालले आयोजनाको जिम्मेवारी पाएको आसन्न १३ औं दक्षिण एसियाली खेलकुद (साग) का लागि राष्ट्रिय खेलकुद परिषद् (राखेप) ले गठन गरेको पूर्वाधार निर्माण तथा तयारी समितिले प्रतिवेदन बुझाएको छ । समितिका संयोजक एवं राखेपका उपाध्यक्ष लामा टेन्डी शेर्पाले युवा तथा खेलकुद मन्त्री जगतबहादुर सुनार (विश्वकर्मा) लाई प्रतिवेदन बुझाए ।

दक्षिण एसियाली ओलम्पिक काउन्सिलले १३ औं सागमा २५ खेल समावेश गर्ने निर्णयलाई लक्षित गरी प्रतिवेदन तयार पारिएको थियो । काउन्सिलले १३ औं सागमा आर्चरी, एथलेटिक्स, फुटबल, ब्याडमिन्टन, बास्केटबल, भलिबल, ह्यान्डबल, बक्सिङ, तेक्वान्दो, उसु, जुडो, ट्रायथलन, कुस्ती, भारोत्तोलन, टेबलटेनिस, स्क्वास, कबड्डी, खो खो, लनटेनिस, सुटिङ, पौडी, साइक्लिङ, फेन्सिङ, कराते र गल्फ समावेश गर्ने निर्णय गरेको थियो ।

प्रतिवेदनमा आर्चरी, भलिबल, ह्यान्डबल, महिला फुटबल र ट्रायथलनलाई पोखरामा आयोजना गर्न प्रस्ताव गरिएको छ । साइक्लिङ काठमाडौं, चितवन वा नवलपरासी मध्ये एक स्थानमा गर्न उपयुक्त हुने सुझाव दिइएको छ । बाँकी खेललाई काठमाडौंमा सञ्चालन गर्न प्रस्ताव गरिएको छ ।

त्यस्तै सागमा समावेश खेलका खेल स्थल र प्रशिक्षणका लागि आवश्यक पर्ने पूर्वाधारका विषयमा पनि उल्लेख गरिएको छ । प्रतिवेदनमा मौजुदा पूर्वाधारलाई उचित मर्मत सम्भार गरी खेल खेलाउन उपयुक्त बनाउनुका साथै निर्माण गर्नु पर्ने नयाँ पूर्वाधारका विषयमा उल्लेख छ ।

समितिले परिषद् मातहत रहेका पूर्वाधारका साथै नेपाली सेना, नेपाल प्रहरी, एपीएफ र विभिन्न संस्थाका पूर्वाधारको समेत अवलोकन गरेको थियो ।