सत्रौं एसियाली जुनियर एथलेटिक्स च्याम्पियनसिपका लागि खेलाडी छनोट प्रतियोगिताको महिला १ सय मिटर दौडमा सरस्वती चौधरी शनिबार पहिलो भएकी छन् । सरस्वतीले निर्धारित दूरी १२.६ सेकेन्डमा पूरा गरिन् ।
त्रिपुरेश्वरस्थित दशरथ रंगशालामा भएको सोही स्पर्धाको पुरुषमा आशिष खत्री पहिलो भए ।उनले ११.३ सेकेन्ड समय खर्चे ।
पुरुष ८ सय मिटर दौडमा ओमप्रकाश शाह २ मिनेट ११.२ सेकेन्ड समय निकाल्दै शीर्ष स्थानमा रहे । उक्त स्पर्धाको महिलामा काजल विष्ट पहिलो भइन् । काजलले २ मिनेट ४५.५ सेकेन्डमा दौड सिध्याइन् ।
भियतनामको होचीमिनमा जुन २ देखि ६ तारिखसम्म हुने प्रतियोगिताको छनोटमा २२ खेलाडीको सहभागिता रहेको नेपाल एथलेटिक्स संघका सचिव आरके विष्टले जनाएका छन् । एक खेलाडीले भियतनाम जाने अवसर प्राप्त गर्ने छन् ।