सेन्चुरी कमर्सियल बैङ्क लिमिटेडले मिति २०७७ फाल्गुन २२ गतेबाट आफ्ना ग्राहक वर्गहरूको सेवामा थप विस्तार गर्ने उद्देश्यले पर्सा जिल्लाको सखुवा प्रसौनी गाउँपालिका ४ को देवरवानामा शाखा रहित बैङ्किङ सेवा सुरु गरेको छ ।

शाखा रहित बैङ्किङ सेवाको शुभारम्भ प्रमुख अतिथिका रूपमा प्रदेश २ का विधायक मन्जुर आलम र विशेष अतिथिको रूपमा सखुवा प्रसौनी गाउँपालिका अध्यक्ष प्रदीप जयसवालले संयुक्त रूपमा एक समारोहबिच गरे । सो अवसरमा अध्यक्ष प्रदीप जयसवालले पर्सा जिल्लाको पुरानो बजारको रूपमा रहेको देवारवा नामा शाखा रहित बैङ्क सेवाबाट स्थानीय जनताले वित्तीय सेवाप्राप्त गरी आर्थिक समृद्धिमा मद्दत पुग्ने बताए । सो कार्यक्रममा बैंैकका प्रदेश नं २ का प्रमुख सौरभ चौधरी, आदर्श नगर शाखाका प्रमुख शिवनाथ साह,लिंकरोड शाखाका प्रमुख सुरेश साह साथै बैङ्कका अन्य कर्मचारी र स्थानीय गरेर १५० जनाभन्दा बढी सहभागिता रहेको थियो । शाखारहित बैङ्किङ सेवामा निक्षेप सङ्कलन, रकम भुक्तानीलगायत बैकले प्रदान गर्ने अन्य सेवा उपलब्ध हुनेछन् ।

आधुनिक प्रविधिको माध्यमबाट देशका दुर्गम तथा सहरी क्षेत्रमा सरल बैंकिग सेवा प्रदान गर्दै आएको सेन्चुरी कमर्सियल बैङ्कले आफ्ना १२० शाखा १० एक्सटेन्सन काउन्टर, २३शाखा रहित बैंकिङ्ग र ८८ एटिएम मार्फत वित्तीय सेवा प्रदान गर्दै आइरहेको छ ।