लोक जनमैत्री बचत तथा ऋण सहकारी संस्था, बिराटनगर–१२ ले आफ्नो १२औं बार्षिक साधारण सभाको उपलक्ष्यमा आयोजित कार्यक्रममा वरिष्ठ अन्तर्राष्ट्रिय ब्याडमिन्टन अम्पायर तथा राष्ट्रिय रेफ्री उदय अर्याल लाई विशेष सम्मान गरेको छ । सो सम्मान कार्यक्रममा अर्याललाई फुलमाला, शल, खादा लगाई कदर–पत्र सहित सम्मानित गरिएको थियो ।
अर्याल जनमैत्री साकोसको संस्थापक सदस्य हुन् । केही समय अघि जापानको टोक्योमा सम्पन्न ‘टोक्यो २०२०, पारालिम्पिक गेम्स ब्याडमिन्टन’ मा नेपाल को प्रतिनिधित्व गर्ने पहिलो नेपाली बन्न सफल भएको हुँदा सम्मान गरिएको हो । उनले पारालिम्पिक गेम्स को प्रथम चरण देखि फाइनल सम्म गरि १७ वटा म्याचहरुमा सहभागी भएका थिए । साकोसकी अध्यक्ष सीता लामिछानेले आफ्नो संस्थाको संस्थापक सदस्य अर्यालले ओलम्पिक जस्तो खेलकूद को महाकुम्भ मा गरिमामय सहभागिता जनाउन सफल हुनुभएकोमा साकोस परिवार अत्यन्त गौरवान्वित भएको कुरा बताइन् । साकोसका सचिव नरेन्द्र भण्डारीले ब्याडमिन्टन खेलको विकासमा लामो समय देखि लाग्नु भएको वरिष्ठ अन्तर्राष्ट्रिय अम्पायर अर्यालले ओलम्पिकमा राष्ट्रको प्रतिनिधित्व गर्नु हुँदा यस क्षेत्र कै शिर गर्वले ठाडो भएको कुरा बताए ।