मित्र राष्ट्र चाईनिज ताईपेईमा आयोजना हुने २९ औं समर युनिभर्सियाड २०१७ मा प्रतिस्पर्धा गर्न जाने खेलाडी तथा अफिसियलहरुलाई ताइवानमा बसोबास गर्ने नेपालीहरुको सस्था ताइवान नेपाल एसोसीएसनले स्वागत गर्ने भएको छ । एसोसीएसनले यस अघि पनि नेपालको पर्यटकीय विकासलाई ध्यान दिदै विविध सांस्कृतीक कार्यक्रम गर्दै आएको थियो । यसैगरी, नेपालमा परेको दैवी र प्राकृतीक विपत्तीको समयमा पनि सहयोग गरेको थियो । एसोसीएसनका प्रमुख राजु गुरुङलाई उद्धृत गर्दै नेपाल पारा तेक्वान्दो संघका अध्यक्ष जर्दान दुंगेलले एसोसीएसनले गरेका काम मध्य काभ्रेको शिक्षा क्षेत्रमा गरेको सहयोग महत्वपूर्ण रहेको बताए ।
यसै विच ताइवान जाने टोलीलाई बिश्वविद्यालय खेलकुद संघ नेपालका पदाधिकारीहरुले मंगलबार शुभकामना सहित विदाई गरे । युनिभर्सियाडमा सहभागी हुने नेपाली टोलीलाई संघका अध्यक्ष प्रदीप जोशीले नेतृत्व प्रदान गर्ने छन् । भाद्र ३ देखि १४ गते सम्म आयोजना हुने युनिभर्सियाडमा भारोत्तोलन, ब्याडमिन्टन, फेन्सिङ्ग, एथलेटिक्स, तेक्वान्दो, टेनिस र टेबलटेनिस गरि ७ खेलमा १८ खेलाडीहरुले प्रतिस्पर्धा गर्ने संघले जनाएको छ ।
तेक्वान्दो तर्फ ४९ केजीमा अस्मिता खड्काले प्रतिस्पर्धा गर्ने छिन् । उनले पुम्से तर्फ पनि प्रतिस्पर्धा गर्ने टिम प्रशिक्षक नोर्वू लामाले जानकारी गराए । यस्तै ५७ केजीमा नम्रता तुलाधर, ७३ केजी माथीमा ओलम्पियन निशा रावल र पुरुष ६८ केजी मुनीमा उमेश राजभण्डारीले प्रतिस्पर्धा गर्नेछन् ।
यस्तै फेन्सिङ्गमा संजीप लामा, ईन्दिरा पौडेल र मन्दिरा थापाले प्रतिस्पर्धा गर्ने छन् भने अफिसियलमा अशोक श्रेष्ठ रहेका छन् । एथलेटिक्समा कृष्ण क्षेत्रीले प्रतिस्पर्धा गर्ने छन । भारोत्तोलनमा टिकामाया गुरुङ्ग र मनिषा रानाभाटले प्रतिस्पर्धा गर्ने छन् । भारोत्तोलनको टिम अफिसियलमा अहमद सकिल रहेका छन् । ब्याडमिन्टनमा दीपक बोहरा, अमिता गिरी, शैलेश दाहाल र अफिसियलमा मदन कार्की, टेनिसमा प्रिती बराल र कृपा शर्मा तथा अफिसियलमा हरिभक्त खड्का रहेका छन् । टेबल टेनिसमा करन राई, युशेष चन्द्र राई र भावुक जोशीले प्रतिस्पर्धा गर्ने छन् ।
यस्तै अन्य अफिसियलहरुमा संघका पदाधिकारीहरु डा. ज्ञानेन्द्र प्रसाद पौड्याल, महासचिव पूर्ण सिंह बोहरा र जनार्जन ढुङ्गेल तथा मेडिया तर्फ दामोदर अर्याल रहेका छन् ।
सो अवसरमा नेपाल फेन्सिङ्ग संघका अध्यक्ष सुनिल कुमार श्रेष्ठले प्रतिस्पर्धा गर्न जाने खेलाडी तथा अफिसियलहरुलाई शुभकामना प्रदान गर्दै राम्रो नतिजा प्राप्त गर्ने विश्वास व्यक्त गरे । टोली बिहिबार त्यस तर्फ प्रस्थान गर्ने कार्यक्रम रहेको छ ।